ཟླ3པའི་ཚེས5ཉིན། ཙུང་ལི་ལི་ཆང་གིས་རྒྱལ་ཡོངས་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པར་སྲིད་གཞུང་བྱ་བའི་སྙན་ཞུ་ཕུལ་ཞིང་། ནང་དོན་གཙོ་བོ་ལ་གཤམ་གསལ་ལྟར།
གཅིག 2025ལོའི་བྱ་བའི་ཕྱིར་རྟོག
◆རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར5%འཕར།
◆གྲོང་ཁྱེར་དང་གྲོང་རྡལ་གྱི་ལས་ཞུགས་མི་གྲངས་ཁྲི1267གསར་དུ་འཕར།
◆འབྲུ་རིགས་ཀྱི་ཐོན་ཚད་རྒྱ་མ་དུང་ཕྱུར་ཁྲི1.43ལ་སླེབས།
◆ནུས་ཁུངས་གསར་པའི་རླངས་འཁོར་གྱི་ལོ་གཅིག་གི་ཐོན་ཚད་རླངས་འཁོར་ཁྲི1600ལས་བརྒལ།
འདས་པའི་ལོ་ལྔ།
◆རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་ལོ་རེར5.4%རེ་འཕར།
◆བཟོ་སྐྲུན་ལས་རིགས་ཀྱི་འཕར་ཐང་གཞི་ཁྱོན་གྱིས་བསྟུད་མར་ལོ16རིང་གོ་ལ་ཧྲིལ་པོའི་ཨང་དང་པོ་ཟིན།
◆སྡོད་དམངས་ཀྱི་མི་རེའི་བཀོལ་ཆོག་པའི་ཡོང་སྒོ་ལོ་རེར5.4%རེ་འཕར།
◆གྲོང་ཁྱེར་དང་གྲོང་རྡལ་གྱི་གསར་དུ་འཕར་བའི་ལས་ཞུགས་མི་གྲངས་བསྡོམས་པས་ཁྲི6000ལས་བརྒལ།
གཉིས། “ལྔ་བཅོ་ལྔ”དུས་སྐབས་ཀྱི་དམིགས་འབེན་གཙོ་བོ་དང་ལས་འགན་གལ་ཆེན།
◆རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་འཕར་ཚད་ལུགས་མཐུན་གྱི་ཁྱབ་ཁོངས་སུ་རྒྱུན་འཁྱོངས་བྱ་རྒྱུ།
◆སྤྱི་ཚོགས་ཡོངས་ཀྱི་ཞིབ་འཇུག་གསར་སྤེལ་གྲོན་དངུལ་གཏོང་ཚད་ལོ་རེར7%ཡན་འཕར་དུ་འཇུག་རྒྱུ།
◆རྩིས་གཞི་རེའི་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་གྱི་དབྱང་གཉིས་ཐཱན་རྫས་འབུད་ཚད་བསྡོམས་པས17%ཆག་ཏུ་འཇུག་རྒྱུ།
◆གྲངས་འཛིན་དཔལ་འབྱོར་གྱི་ལྟེ་བའི་ཐོན་ལས་ཀྱི་འཕར་ཐང་གིས་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་གྱི་ཟིན་ཚད12.5%ལ་བསླེབ་ཏུ་འཇུག་རྒྱུ།
◆ངལ་རྩོལ་པའི་མི་འབོར་གྱི་ཆ་སྙོམས་སློབ་གསོ་མྱོང་བའི་ལོ་ཚད་ལོ11.7གྱིས་གོང་དུ་འཕེལ་དུ་འཇུག་རྒྱུ།
◆མི་རེའི་ཆ་སྙོམས་སྔོན་དཔག་ཚེ་ཚད་ལོ80ལ་མཐོར་འདེགས་བྱ་རྒྱུ།
◆འབྲུ་རིགས་ཀྱི་ཕྱོགས་བསྡུས་ཐོན་སྐྱེད་ནུས་པ་རྒྱ་མ་དུང་ཕྱུར་ཁྲི1.45ཡས་མས་སུ་བསླེབ་ཏུ་འཇུག་རྒྱུ།
◆ནུས་ཁུངས་ཀྱི་ཕྱོགས་བསྡུས་ཐོན་སྐྱེད་ནུས་པ་ཚད་ལྡན་རྡོ་སོལ་ཏུན་དུང་ཕྱུར58ལ་བསླེབ་ཏུ་འཇུག་རྒྱུ།
གསུམ། 2026ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྤྱིའི་བླང་བྱ་དང་སྲིད་ཇུས་ཀྱི་ཁ་ཕྱོགས།
◆དཔལ་འབྱོར་འཕར་ཚད4.5%ནས5%བར་བསླེབ་པར་བྱེད་པ།
◆གྲོང་ཁྱེར་དང་གྲོང་རྡལ་དུ་ལས་ཞུགས་མི་གྲངས་ཁྲི1200ཡན་གསར་དུ་འཕར་བར་བྱེད་པ།
◆སྡོད་དམངས་ཀྱི་འཛད་སྤྱོད་རིན་གོང་འཕར་ཚད2%ཡས་མས་སུ་བསླེབ་པར་བྱེད་པ།
◆འབྲུ་རིགས་ཐོན་ཚད་རྒྱ་མ་དུང་ཕྱུར་ཁྲི1.4ཡས་མས་སུ་བསླེབ་ཏུ་འཇུག་རྒྱུ།
◆རྩིས་གཞི་རེའི་རྒྱལ་ནང་ཐོན་སྐྱེད་རིན་ཐང་བསྡོམས་འབོར་གྱི་དབྱང་གཉིས་ཐཱན་རྫས་འབུད་ཚད3.8%ཡས་མས་ཆག་པར་བྱེད་པ།
◆མཚལ་ཡིག་གི་ཚད4%ཡས་མས་ལྟར་བཀོད་སྒྲིག་བྱ་བ་དང་། མཚལ་ཡིག་གི་གཞི་ཁྱོན་ལོ་སྔོན་མ་ལས་སྒོར་དུང་ཕྱུར2300འཕར་བར་བྱེད་པ།
◆སྤྱིར་བཏང་གི་སྤྱི་པའི་སྔོན་རྩིས་འགྲོ་སྒོའི་གཞི་ཁྱོན་ཐོག་མར་སྒོར་དུང་ཕྱུར་ཁྲི30ལ་བསླེབ་པར་བྱེད་པ།
◆དུས་ཡུན་ཤིན་ཏུ་རིང་བའི་དམིགས་བསལ་རྒྱལ་བུན་སྒོར་དུང་ཕྱུར་ཁྲི1.3འགྲེམ་སྤེལ་བྱེད་རྩིས་ཡོད་པ།
◆ས་གནས་སྲིད་གཞུང་གི་ཆེད་སྤྱོད་བུན་འཛིན་སྒོར་དུང་ཕྱུར་ཁྲི4.4བཀོད་སྒྲིག་བྱེད་རྩིས་ཡོད་པ།
བཞི། 2026ལོའི་བྱ་བའི་ལས་འགན་ཁག་ཅིག
◆ཡོང་འབབ་འཕར་བ། གྲོང་ཁྱེར་དང་གྲོང་གསེབ་ཀྱི་སྡོད་དམངས་ཀྱི་ཡོང་འབབ་འཕར་བར་བྱེད་པའི་འཆར་གཞི་བཟོ་བ་དང་ལག་བསྟར་བྱེད་པ། ཡོང་འབབ་དམའ་བའི་ཚོགས་སྤྱིའི་ཡོང་འབབ་འཕར་བར་སྐུལ་འདེད་གཏོང་བ་དང་། སྡོད་དམངས་ཀྱི་རྒྱུ་ནོར་རང་བཞིན་གྱི་ཡོང་འབབ་ཇེ་མང་དུ་གཏོང་བ། གླ་ཕོགས་དང་སྤྱི་ཚོགས་འགན་བཅོལ་ལམ་ལུགས་འཐུས་ཚང་དུ་གཏོང་བ་སོགས་ཀྱི་ཕྱོགས་ནས་དོན་ལྡན་གྱི་བྱེད་ཐབས་སྐོར་ཞིག་འདོན་དགོས།
◆འཛད་སྤྱོད། དུས་ཡུན་ཤིན་ཏུ་རིང་བའི་དམིགས་བསལ་རྒྱལ་བུན་སྒོར་དུང་ཕྱུར2500བཀོད་སྒྲིག་བྱས་ནས། དངོས་རྫས་རྙིང་པ་གསར་བརྗེ་ལ་རྒྱབ་སྐྱོར་བྱེད་དགོས།
◆དངུལ་གཏོང་། ཀྲུང་དབྱང་གི་སྔོན་རྩིས་ནང་ཚུན་ནས་མ་དངུལ་སྒོར་དུང་ཕྱུར7550བཀོད་སྒྲིག་བྱེད་རྩིས་ཡོད་པ་དང་། དུས་ཡུན་ཤིན་ཏུ་རིང་བའི་དམིགས་བསལ་རྒྱལ་བུན་མ་དངུལ་སྒོར་དུང་ཕྱུར8000བཀོད་སྒྲིག་བྱས་ནས།“གལ་གནད་གཉིས”ཀྱི་འཛུགས་སྐྲུན་ལ་སྤྱོད་དགོས།
◆སྤུས་གསར་ཐོན་སྐྱེད་ནུས་ཤུགས། འདུས་གྲུབ་གློག་ལམ་དང་མཁའ་འགྲུལ་དང་འཇིག་རྟེན་འཕུར་སྐྱོད། སྐྱེ་དངོས་སྨན་རྫས། དམའ་དབྱིངས་དཔལ་འབྱོར་སོགས་གསར་དར་ཀ་རྟེན་ཐོན་ལས་བསྐྲུན་དགོས། མ་འོངས་པའི་ནུས་ཁུངས་དང་ཚད་རྡུལ་ཚན་རྩལ། གཟུགས་ལྡན་རིག་ནུས། ཀླད་འཕྲུལ་མཐུད་སྦྲེལ། 6Gསོགས་མ་འོངས་པའི་ཐོན་ལས་གསོ་སྐྱོང་དང་འཕེལ་རྒྱས་གཏོང་དགོས། “མིས་བཟོས་རིག་ནུས+”རྒྱ་སྐྱེད་གཏིང་ཟབ་ཏུ་གཏོང་དགོས།
◆རྒྱལ་ཡོངས་གཅིག་གྱུར་གྱི་ཚོང་ར་ཆེན་པོ། ཐོན་ནུས་སྙོམས་སྒྲིག་དང་ཚད་གཞིའི་སྣེ་ཁྲིད། རིན་གོང་ཁྲིམས་བསྟར། སྤུས་ཚད་ལྟ་སྐུལ་དོ་དམ་སོགས་ཀྱི་བྱེད་སྟངས་ཕྱོགས་བསྡུས་ཀྱིས་སྤྱད་དེ། “ནང་སྒྲིལ་རྣམ་པའི”འགྲན་རྩོད་བཅོས་སྐྱོང་གཏིང་ཟབ་བྱེད་དགོས།
◆སྒོ་འབྱེད། རིན་ཐང་འཕར་བའི་གློག་འཕྲིན་དང་སྐྱེ་དངོས་ལག་རྩལ། ཕྱི་རྒྱལ་ཚོང་པའི་མ་རྩ་ཁེར་འཇོག་སྨན་ཁང་སོགས་ཁྱབ་ཁོངས་ཀྱི་སྒོ་འབྱེད་ཚོད་ལྟ་སྔར་བས་རྒྱ་ཆེར་གཏོང་དགོས།
◆གྲོང་གསེབ་ཁྱོན་ཡོངས་དར་སྤེལ། སྐོར་གཉིས་པའི་ས་ཞིང་འགན་གཙང་ལེན་གྱི་དུས་ཚད་ལོངས་རྗེས་སླར་ཡང་ཞིང་ཆེན་ཧྲིལ་པོའི་ཚོད་ལྟ་ལོ30ལ་ཁྱོན་ཡོངས་ནས་བསྲིང་བ་དང་། རྒྱལ་ཡོངས་ཀྱི་ཞིང་ལས་ཡོངས་ཁྱབ་ཞིབ་བཤེར་ཐེངས་བཞི་པ་སྤེལ་དགོས།
◆རྣམ་པ་གསར་པའི་གྲོང་ཁྱེར་དང་གྲོང་རྡལ་ཅན། ཚན་རིག་དང་མཐུན་ཞིང་གོ་རིམ་ལྡན་པའི་སྒོ་ནས་ཞིང་ལས་སྤོ་སྒྱུར་མི་འབོར་གྲོང་མི་ཅན་དུ་འགྱུར་བར་སྐུལ་འདེད་གཏོང་བ་དང་། ཡུལ་བབ་དང་བསྟུན་ནས་གང་ལ་སྤར་སའི་གནས་དེའི་འབྲིང་རྒྱུགས་ལ་མིང་ཐོ་འགོད་པའི་ཆ་རྐྱེན་ཇེ་ཡངས་སུ་གཏོང་དགོས།
◆ལས་ཞུགས། ལས་ཞུགས་མཛའ་མཐུན་ཅན་གྱི་འཕེལ་རྒྱས་གཏོང་སྟངས་བསྐྲུན་དགོས། ལས་གནས་བརྟན་ཞིང་ཤོང་ཚད་ཆེ་རུ་གཏོང་བ་དང་སྤུས་ཚད་མཐོ་རུ་གཏོང་བའི་འགུལ་སྐྱོད་ལག་བསྟར་བྱེད་དགོས།
◆སློབ་གསོ། རིན་མེད་སློབ་སྔོན་སློབ་གསོའི་སྲིད་ཇུས་འཐུས་ཚང་དུ་བཏང་ནས། མཐོ་རིམ་སློབ་འབྲིང་དཀྱུས་མའི་བསླབ་གནས་མཁོ་སྤྲོད་བྱེད་ཚད་ཇེ་མང་དུ་གཏོང་དགོས།
◆སྨན་བཅོས་འཕྲོད་བསྟེན། སྡོད་དམངས་ཀྱི་སྨན་བཅོས་འགན་བཅོལ་གྱི་མི་རེའི་ཆ་སྙོམས་ནོར་སྲིད་ཁ་གསབ་ཚད་གཞི་སྒོར24ཡིས་མཐོར་འདེགས་གཏོང་དགོས།
◆སྤྱི་ཚོགས་འགན་སྲུང་། གྲོང་ཁྱེར་དང་གྲོང་གསེབ་ཀྱི་སྡོད་དམངས་ཀྱི་རྨང་གཞིའི་རྒན་གསོ་མ་དངུལ་གྱི་ཟླ་རེའི་མ་མཐའི་ཚད་གཞི་སྒོར20ཡིས་ཇེ་མཐོར་གཏོང་དགོས། གཉེན་སྒྲིག་ཐོག་མ་དང་ཕྲུ་གུ་ཐོག་མ་སྐྱེས་པའི་ཁྱིམ་ཚང་གི་སྡོད་ཁང་འགན་སྲུང་བྱེད་ཤུགས་ཆེ་རུ་གཏོང་བ་དང་། བུ་ཕྲུག་མང་བའི་ཁྱིམ་ཚང་གི་ལེགས་བཅོས་རང་བཞིན་གྱི་སྡོད་ཁང་གི་དགོས་མཁོ་ལ་རྒྱབ་སྐྱོར་བྱེད་དགོས།
◆ལྗང་མདོག་འཕེལ་རྒྱས། རྒྱལ་ཁབ་ཀྱི་ཐཱན་དམའ་ཚུལ་སྒྱུར་ཐེབས་རྩ་བཙུགས་ནས། ཆིང་ནུས་དང་ལྗང་མདོག་འབར་རྫས་སོགས་འཕར་གཞི་གསར་པ་གསོ་སྐྱོང་བྱེད་དགོས།
◆ཁང་སའི་བདག་ཁོངས། གྲོང་ཁྱེར་དང་བསྟུན་ནས་ཐབས་ཇུས་ལག་བསྟར་བྱས་ཏེ་འཕར་ཚད་ཚོད་འཛིན་དང་། མཛོད་ཉར་ཉུང་འཕྲི། མཁོ་སྤྲོད་ཇེ་ལེགས་སུ་གཏོང་བ་བཅས་བྱས་ཏེ། ཚོང་ཟོང་ཁང་པ་གསོག་ཉར་ལས་ཐར་བར་ཐབས་ལམ་མང་པོ་འཚོལ་ཞིབ་བྱེད་དགོས།
