11 - تۈركۈمدىكى ئۆلكە، بىۋاسىتە قاراشلىق شەھەرلەرنىڭ شىنجاڭغا ياردەم بېرىش خىزمىتى بويىچە خۇلاسىلەش، تەقدىرلەش يىغىنى ئۆتكۈزۈلدى

چېن شياۋجياڭ قاتناشتى ھەم سۆز قىلدى، ئەركىن تۇنىياز رىياسەتچىلىك قىلدى، زۇمرەت ئوبۇل، نۇرلان ئەبىلمەجىن، خې جۇڭيوۋ، چېن مىڭگو قاتناشتى

4 - ئاينىڭ 27 - كۈنى، 11 - تۈركۈمدىكى ئۆلكە، بىۋاسىتە قاراشلىق شەھەرلەرنىڭ شىنجاڭغا ياردەم بېرىش خىزمىتى بويىچە خۇلاسىلەش، تەقدىرلەش يىغىنى ئۈرۈمچىدە ئۆتكۈزۈلدى. ئاپتونوم رايونلۇق پارتىيە كومىتېتىنىڭ شۇجىسى چېن شياۋجياڭ يىغىنغا قاتناشتى ھەم سۆز قىلدى. □ ئانار بۇلۇت\شىنجاڭ گېزىتى مۇخبىرى سۈي جىجيەن فوتوسى

شىنجاڭ گېزىتى، ئۈرۈمچى، 4 - ئاينىڭ 27 - كۈنى خەۋىرى ئانار بۇلۇت\شىنجاڭ گېزىتى مۇخبىرلىرى ۋاڭ شىڭرۇي، ليۇ يى خەۋەر قىلىدۇ: 4 - ئاينىڭ 27 - كۈنى، 11 - تۈركۈمدىكى ئۆلكە، بىۋاسىتە قاراشلىق شەھەرلەرنىڭ شىنجاڭغا ياردەم بېرىش خىزمىتى بويىچە خۇلاسىلەش، تەقدىرلەش يىغىنى ئۈرۈمچىدە ئۆتكۈزۈلدى. ئاپتونوم رايونلۇق پارتىيە كومىتېتىنىڭ شۇجىسى چېن شياۋجياڭ يىغىنغا قاتناشتى ھەم سۆز قىلدى.

ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز رىياسەتچىلىك قىلدى. ئاپتونوم رايونلۇق خەلق قۇرۇلتىيى دائىمىي كومىتېتىنىڭ مۇدىرى زۇمرەت ئوبۇل، ئاپتونوم رايونلۇق سىياسىي كېڭەشنىڭ رەئىسى نۇرلان ئەبىلمەجىن، ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، بىڭتۇەننىڭ جېڭۋېيسى خې جۇڭيوۋ، ئاپتونوم رايونلۇق پارتىيە كومىتېتىنىڭ مۇئاۋىن شۇجىسى چېن مىڭگو قاتناشتى. ئاپتونوم رايونلۇق پارتىيە كومىتېتى دائىمىي كومىتېتىنىڭ ئەزاسى، تەشكىلات بۆلۈمىنىڭ باشلىقى ۋاڭ لىن ئاپتونوم رايونلۇق پارتىيە كومىتېتى ۋە ھۆكۈمەتنىڭ 11 - تۈركۈمدىكى ئۆلكە، بىۋاسىتە قاراشلىق شەھەرلەرنىڭ شىنجاڭغا ياردەم بېرىش خىزمىتى بويىچە ئىلغار كوللېكتىپلارنى تەقدىرلەش توغرىسىدىكى ئومۇمىي ئۇقتۇرۇشى ۋە 11 - تۈركۈمدىكى ئۆلكە، بىۋاسىتە قاراشلىق شەھەرلەردىن شىنجاڭغا ياردەم بەرگەن مۇنەۋۋەر كادىرلار، ئىختىساسلىقلارنى تەقدىرلەش توغرىسىدىكى قارارىنى ئوقۇپ ئۆتتى.

شادىيانە مۇزىكا ساداسى ئىچىدە، چېن شياۋجياڭ قاتارلىق ئاپتونوم رايون رەھبەرلىرى ئىلغار كوللېكتىپ ۋە مۇنەۋۋەر شەخسلەر ۋەكىللىرىگە مۇكاپات تارقىتىپ بەردى.

چېن شياۋجياڭ سۆزىدە ئاپتونوم رايونلۇق پارتىيە كومىتېتى، ھۆكۈمەت، بىڭتۇەن ۋە شىنجاڭدىكى ھەر مىللەت كادىرلار، ئاممىغا ۋاكالىتەن، تەقدىرلەنگەن ئىلغار كوللېكتىپ ۋە مۇنەۋۋەر شەخسلەرنى قىزغىن تەبرىكلىدى، 11 - تۈركۈمدىكى ئۆلكە، بىۋاسىتە قاراشلىق شەھەرلەردىن شىنجاڭغا ياردەم بەرگەن كادىرلار، ئىختىساسلىقلارغا ئالىي ئېھتىرام بىلدۈردى، شىنجاڭنىڭ ئىسلاھات، تەرەققىيات، مۇقىملىقى ئۈچۈن مۇھىم تۆھپە قوشقان شىنجاڭغا نىشانلىق ياردەم بېرىۋاتقان ئۆلكە، بىۋاسىتە قاراشلىق شەھەرلەرگە چىن كۆڭلىدىن رەھمەت ئېيتتى. ئۇ مۇنداق دېدى: ئۆتكەن ئۈچ يىلدا شىنجاڭغا ياردەم بېرىۋاتقان ھەرقايسى ئۆلكە، بىۋاسىتە قاراشلىق شەھەرلەر باشتىن - ئاخىر شىنجاڭغا نىشانلىق ياردەم بېرىش خىزمىتىنى مۇھىم سىياسىي مەسئۇلىيەت قىلىپ، شىنجاڭغا ئومۇميۈزلۈك ياردەم بېرىش، شىنجاڭغا دەل جايىدا ياردەم بېرىش، شىنجاڭغا ئۇزاققىچە ياردەم بېرىشتە چىڭ تۇرۇپ، شىنجاڭنىڭ جەمئىيەت مۇقىملىقى ۋە ئەبەدىي ئەمىنلىك ئاساسىنى تېخىمۇ مۇستەھكەملەش، جۇڭخۇا مىللىتى ئورتاق گەۋدىسى قۇرۇلۇشىنى چوڭقۇر، پۇختا ئەمەلىيلەشتۈرۈش، يۇقىرى سۈپەتلىك تەرەققىيات نەتىجىلىرى ئارقىلىق خەلق تۇرمۇشىغا تېخىمۇ كۆپ، تېخىمۇ ياخشى نەپ يەتكۈزۈپ قەلبلەرنى مۇجەسسەملەش، جەنۇبىي شىنجاڭنىڭ تەرەققىيات ھاياتىي كۈچىنى سىجىل ئۇرغۇتۇش، بىڭتۇەن بىلەن يەرلىكنىڭ يۇغۇرما تەرەققىياتىنى ئۈزلۈكسىز چوڭقۇرلاشتۇرۇشقا تۈرتكە بولدى. شىنجاڭغا نىشانلىق ياردەم بېرىشتە قولغا كەلتۈرۈلگەن مول نەتىجىلەر پارتىيەنىڭ رەھبەرلىكى ۋە سوتسىيالىزم تۈزۈمىنىڭ ئۆزگىچە ئەۋزەللىكىنى تولۇق نامايان قىلدى، مىللەتلەر مەسىلىسىنى ھەل قىلىشنىڭ جۇڭگوچە توغرا يولىنىڭ قۇدرەتلىك ھاياتىي كۈچىنى تولۇق نامايان قىلدى، جۇڭخۇا مىللىتى بىر ئائىلە كىشىلىرىدىن بولۇشنى تولۇق گەۋدىلەندۈردى. نەتىجىلەرنىڭ قولغا كەلتۈرۈلۈشى نېگىزىدىن ئېيتقاندا، يولداش شى جىنپىڭ يادرولۇقىدىكى پارتىيە مەركىزىي كومىتېتىنىڭ كۈچلۈك رەھبەرلىكىدىن بولدى، شى جىنپىڭ يېڭى دەۋر جۇڭگوچە سوتسىيالىزم ئىدىيەسىنىڭ ئىلمىي يېتەكچىلىكىدىن بولدى، شىنجاڭغا ياردەم بېرىۋاتقان ھەرقايسى ئۆلكە، بىۋاسىتە قاراشلىق شەھەرلەرنىڭ ئۇزاقتىن بۇيان زور كۈچ بىلەن قوللىغانلىقىنىڭ پايدىسىدىن بولدى، بۇنىڭغا شىنجاڭغا ياردەم بېرىۋاتقان كەڭ كادىرلار، ئىختىساسلىقلارنىڭ جاپالىق ئەجرى مۇجەسسەملەنگەن. 11 - تۈركۈمدىكى ئۆلكە، بىۋاسىتە قاراشلىق شەھەرلەردىن شىنجاڭغا ياردەم بەرگەن كادىرلار، ئىختىساسلىقلار شىنجاڭنى يۇرتى، ئاممىنى قېرىندىشى دەپ بىلىپ، تىيانشاننىڭ جەنۇبى - شىمالىدا كۈرەش ئىزلىرىنى قالدۇرۇپ، كىشىنى چوڭقۇر تەسىرلەندۈرىدىغان شىنجاڭغا ياردەم بېرىش ھېكايىلىرىنى يېزىپ چىقتى، 26 مىليوندىن ئارتۇق ھەر مىللەت ئامما بۇنى مەڭگۈ ئۇنتۇمايدۇ!

چېن شياۋجياڭ مۇنداق دېدى: شىنجاڭغا ياردەم بېرىۋاتقان كادىرلار، ئىختىساسلىقلارنىڭ باش شۇجى شى جىنپىڭنىڭ سەمىمىي تاپشۇرۇقىنى ئەستە چىڭ ساقلاپ، كۆۋرۈكلۈك، ۋاسىتىلىك رولىنى داۋاملىق جارى قىلدۇرۇپ، شىنجاڭغا ئىلگىرىكىدەكلا كۆڭۈل بۆلۈپ ۋە مەدەت بېرىپ، شىنجاڭغا ياردەم بېرىش مەشئىلىنى ياخشى يەتكۈزگۈچىلەردىن بولۇپ، تېخىمۇ كۆپ كىشىنىڭ شىنجاڭغا ياردەم بېرىش، شىنجاڭنى گۈللەندۈرۈشىگە تۈرتكە بولۇپ، شىنجاڭغا ياردەم بېرىش ئىشلىرىنىڭ ياخشى تۈرتكە بولغۇچىلىرىدىن بولۇپ، ياردەم بېرىۋاتقان ۋە ياردەمگە ئېرىشىۋاتقان ئىككى تەرەپنىڭ ھەرقايسى ساھەلەردىكى ھەمكارلىقىنى چوڭقۇرلاشتۇرۇشقا كۈچ قوشۇپ، مىللەتلەر ئىتتىپاقلىقىنى ياخشى ئەمەلدە كۆرسەتكۈچىلەردىن بولۇپ، ھەر مىللەت كادىرلار، ئاممىنىڭ ئارىلىشىشى، ئالماشتۇرۇشى، يۇغۇرۇلۇشىنى ئىلگىرى سۈرۈپ، يېڭى مۇساپىدە سوتسىيالىستىك زامانىۋىلاشقان شىنجاڭ قۇرۇپ چىقىش ئۈچۈن يەنە يېڭى تۆھپە قوشۇشىنى ئۈمىد قىلىمەن.

چېن شياۋجياڭ مۇنداق تەكىتلىدى: شىنجاڭ ئاساسىي گەۋدىلىك مەسئۇلىيىتىنى ھەقىقىي زىممىگە ئېلىشى كېرەك، ھەر دەرىجىلىك پارتىيە كومىتېتى شىنجاڭغا نىشانلىق ياردەم بېرىش خىزمىتىنى گەۋدىلىك ئورۇنغا قويۇپ، شىنجاڭغا ياردەم بېرىش تۈزۈلمە - مېخانىزمىنى تاكامۇللاشتۇرۇپ، شىنجاڭغا ياردەم بېرىشنىڭ ئۇنىۋېرسال ئۈنۈمىنى ئۈزلۈكسىز ئۆستۈرۈشى كېرەك؛ ياردەمگە ئېرىشىۋاتقان ئورۇنلار مۇلازىمەت كاپالىتىنى كۈچەيتىپ، شىنجاڭغا ياردەم بېرىش تۈرلىرى، مەبلىغى، سىياسىتىنىڭ جايىدا ئەمەلىيلىشىشىنى ياخشى تۇتۇپ، شىنجاڭغا ياردەم بېرىۋاتقان كادىرلار، ئىختىساسلىقلاردىن ياخشى پايدىلىنىشى كېرەك؛ كەڭ پارتىيە ئەزالىرى، كادىرلار شىنجاڭغا ياردەم بېرىۋاتقان كادىرلار، ئىختىساسلىقلار بىلەن بولغان پىكىر ئالماشتۇرۇشنى كۈچەيتىپ، ئىقتىدارى، قابىلىيىتىنى ئۈزلۈكسىز ئۆستۈرۈپ، شىنجاڭغا ياردەم بېرىش ئىشلىرىدا يېڭى نەتىجىلەرنى قولغا كەلتۈرۈشكە تۈرتكە بولۇشى كېرەك.

يىغىندا بورتالا موڭغۇل ئاپتونوم ئوبلاستلىق پارتىيە كومىتېتىنىڭ مۇئاۋىن شۇجىسى فاڭ شياڭرۇڭ، خوتەن ۋىلايىتى قاراقاش ناھىيەلىك پارتىيە كومىتېتىنىڭ مۇئاۋىن شۇجىسى كاڭ جيامىڭ، شىنجاڭ تەبىئىي پەن ۋە سانائەت پەنلىرى شۆيۈەنى يېمەكلىك ئىلمى ۋە سانائەت قۇرۇلۇشى شۆيۈەنىنىڭ مۇئاۋىن باشلىقى لى جيا، قەشقەر ۋىلايەتلىك 2 - خەلق دوختۇرخانىسىنىڭ باشلىقى چېن ۋېيخۇا، ئالتاي ۋىلايەتلىك مەدەنىيەت - تەنتەربىيە - رادىيو - تېلېۋىزىيە ۋە ساياھەت ئىدارىسى تەنتەربىيە بۆلۈمىنىڭ مۇئاۋىن باشلىقى جاڭ چيۇشۇاڭ شىنجاڭغا ياردەم بېرىۋاتقان كادىرلار، ئىختىساسلىقلارغا ۋاكالىتەن سۆز قىلدى.

ۋاڭ جيەنشىن، جاڭ يىڭچۇن، ئېلزات ئەخمەتجان، قادېن كەبىن، ئاپتونوم رايونلۇق شىنجاڭغا نىشانلىق ياردەم بېرىش خىزمىتىنى ماسلاشتۇرۇش رەھبەرلىك گۇرۇپپىسىغا ئەزا ئورۇنلاردىكى مەسئۇل يولداشلار، 11 - تۈركۈمدىكى شىنجاڭغا ياردەم بەرگەن ئۆلكە، بىۋاسىتە قاراشلىق شەھەرلەرنىڭ ئالدىنقى سەپ قوماندانلىق ئىشتابلىرىنىڭ قوماندانلىرى ۋە شىنجاڭغا ياردەم بېرىۋاتقان كادىرلار، ئىختىساسلىقلار ۋەكىللىرى، 12 - تۈركۈمدىكى ئۆلكە، بىۋاسىتە قاراشلىق شەھەرلەردىن ۋاقىتنى تەڭشەپ نۆۋەت بىلەن ئالماشقان شىنجاڭغا ياردەم بېرىش تايانچلىرى، ھەرقايسى ۋىلايەت، ئوبلاست، شەھەرلىك پارتىيە كومىتېتى تەشكىلات بۆلۈمىدىكى مەسئۇل يولداشلار ئاساسىي يىغىن مەيدانىدا يىغىنغا قاتناشتى. ھەرقايسى ۋىلايەت، ئوبلاست، شەھەرلەر ۋە ئالاقىدار ناھىيە، شەھەر، رايونلاردا شۆبە يىغىن مەيدانى تەسىس قىلىندى.

بۇ مەزمۇن يارىغان بولسا، كۆپلەپ تارقىتىپ قويغايسىز